नेपाल सरकारले सार्वजनिक बिदा व्यवस्थालाई पुनरावलोकन गर्ने उद्देश्यले गृह मन्त्रालयका सहसचिवको संयोजकत्वमा चार सदस्यीय कार्यदल गठन गर्ने निर्णय गरेको छ ।
मुख्यसचिव गोविन्दबहादुर कार्कीको अध्यक्षतामा सोमबार बसेको सचिवहरूको बैठकले सातामा शनिबार र आइतबार दुई दिन सार्वजनिक बिदा लागू भइसकेको अवस्थालाई ध्यानमा राख्दै विद्यमान अन्य सार्वजनिक बिदाको समीक्षा गर्न कार्यदल गठन गर्ने निर्णय गरेको हो ।
निर्णयअनुसार कार्यदलमा प्रधानमन्त्री तथा मन्त्रिपरिषद्को कार्यालय, भूमि व्यवस्था, सहकारी तथा गरिबी निवारण मन्त्रालय, सङ्घीय मामिला तथा सामान्य प्रशासन मन्त्रालय र अर्थ मन्त्रालयका प्रतिनिधि सदस्य रहनेछन् । कार्यदलले १५ दिनभित्र आफ्नो प्रतिवेदन गृह मन्त्रालयमा बुझाउनेछ । बैठकले चालु आर्थिक वर्षभित्र तयार गर्ने लक्ष्य राखिएका विधेयकहरूको मस्यौदा सम्बन्धित मन्त्रालयहरूले यथाशीघ्र तयार गर्न प्रक्रिया अघि बढाउने निर्णय पनि गरेको छ ।
त्यसैगरी, लामो समयदेखि प्रयोगमा रहेका तर वर्तमान सन्दर्भमा आवश्यक नभएका तथा प्रशासनिक कार्यसम्पादनमा अवरोध सिर्जना गर्ने कानुनहरूको पहिचान गरी तिनलाई खारेज गर्ने प्रक्रिया सम्बन्धित मन्त्रालयहरूले अघि बढाउने निर्णय बैठकले गरेको छ ।
Leave a Reply