काठमाडौं— नेपाली बजारमा सुनचाँदीको भाउमा आज उल्लेखनीय वृद्धि भएको छ। नेपाल सुनचाँदी व्यवसायी महासंघका अनुसार सुनको मूल्य एकैदिन तोलामा १४ हजार ६०० रुपैयाँले बढेको छ।
आज छापावाला सुनको भाउ प्रतितोला २ लाख ८८ हजार ५०० रुपैयाँ पुगेको छ, जुन अघिल्लो दिनको २ लाख ७३ हजार ९०० रुपैयाँको तुलनामा उच्च वृद्धि हो। पछिल्लो समय अन्तर्राष्ट्रिय बजारमा भइरहेको उतारचढाव तथा मुद्रा विनिमय दरको प्रभावले स्थानीय बजारमा समेत सुनको मूल्य निरन्तर उकालो लागिरहेको देखिएको छ।
त्यसैगरी चाँदीको भाउ पनि बढेको छ। अघिल्लो दिन प्रतितोला ४ हजार ५०५ रुपैयाँमा कारोबार भएको चाँदी आज ४१५ रुपैयाँले वृद्धि भई ४ हजार ९२० रुपैयाँ प्रतितोला पुगेको छ।
व्यवसायीहरूका अनुसार आगामी दिनमा पनि अन्तर्राष्ट्रिय बजारको प्रभाव अनुसार मूल्यमा थप उतारचढाव हुन सक्ने सम्भावना रहेको छ। सुनचाँदीको बढ्दो मूल्यले बजारमा खरिद–बिक्रीमा केही असर पार्ने अनुमान गरिएको छ।
