बागमती प्रदेश सरकारले प्रदेशभित्र कार्यरत पत्रकारलाई प्रदेश अस्पतालबाट उपलब्ध हुने केही स्वास्थ्य सेवामा ५० प्रतिशत सहुलियत प्रदान गर्ने निर्णय गरेको छ ।
स्वास्थ्य मन्त्रालयमा आयोजित कार्यक्रममा बागमती प्रदेशका स्वास्थ्यमन्त्री किरण थापामगरले मन्त्रीस्तरीय निर्णयअनुसार नेपाल पत्रकार महासङ्घ, बागमती प्रदेशको सिफारिसका आधारमा पत्रकारलाई उक्त सहुलियत उपलब्ध गराइने जानकारी दिनुभयो ।
निर्णयअनुसार प्रदेश अस्पतालहरूमा उपलब्ध आइसियु, प्रयोगशाला, एक्सरे, सिटी स्क्यान, एमआरआई तथा भिडियो एक्सरेलगायत स्वास्थ्य सेवामा पत्रकारले ५० प्रतिशत छुट पाउने व्यवस्था गरिएको मन्त्रालयले जनाएको छ ।
नेपाल पत्रकार महासङ्घ, बागमती प्रदेशका अध्यक्ष कृष्ण सारु मगरले यस निर्णयले प्रदेशका पत्रकारलाई स्वास्थ्य उपचारमा प्रत्यक्ष राहत पुग्ने विश्वास व्यक्त गर्नुभयो ।
