२०८३ सालको सार्वजनिक बिदाको सूची राजपत्रमा प्रकाशित

काठमाडौं – सरकारले विसं २०८३ सालका लागि सार्वजनिक बिदाको सूची राजपत्रमा प्रकाशित गरेको छ।

१३ फागुनमा बसेको मन्त्रिपरिषद् बैठकले आगामी वर्षका सार्वजनिक बिदा निर्धारण गर्ने निर्णय गरेको थियो। सोही निर्णयअनुसार मंगलबार बिदाको सूची राजपत्रमार्फत सार्वजनिक गरिएको हो।

सरकारले हरेक वर्ष विभिन्न चाडपर्व, राष्ट्रिय दिवस तथा विशेष अवसरलाई समेटेर सार्वजनिक बिदा निर्धारण गर्दै आएको छ। २०८३ सालका लागि तय गरिएका बिदाहरूमा राष्ट्रिय पर्व, धार्मिक तथा सांस्कृतिक पर्वहरू, अन्तर्राष्ट्रिय दिवस र क्षेत्रगत रूपमा मानिने विशेष बिदाहरू समावेश गरिएको जनाइएको छ।

गृह मन्त्रालयका अनुसार राजपत्रमा प्रकाशित सूचीअनुसार संघीय, प्रदेश र स्थानीय तहका कार्यालयहरूमा लागू हुने गरी बिदा कार्यान्वयन हुनेछ। केही बिदा भने सम्बन्धित प्रदेश वा समुदायमा मात्र लागू हुनेछन्।

सरकारले सम्बन्धित निकाय तथा सर्वसाधारणलाई राजपत्रमा प्रकाशित सूचीअनुसार आवश्यक तयारी गर्न आग्रह गरेको छ।