पोखरा — नेपालकै सबैभन्दा पुरानो र ठूलो शिक्षण संस्था त्रिभुवन विश्वविद्यालय ले उच्च शिक्षामा सेवासुविधा अझ व्यवस्थित र नजिकबाट उपलब्ध गराउने उद्धेश्यका साथ गण्डकी च्याप्टर (प्रादेशिक कार्यालय) निर्माणको योजना अघि बढाएको छ । यस उद्देश्यका लागि शनिबार पोखरामा आयोजित कार्यशालामा विश्वविद्यालयका उपकुलपति र सम्बन्धित अधिकारीहरूले संयुक्त रूपमा कार्यक्रम उद्घाटन गरे ।
कार्यशालामा विश्वविद्यालयले गण्डकी प्रदेशभित्रका पृथ्वीनारायण क्याम्पसलाई मूल संरचनामा राखेर आवश्यक कार्ययोजना र रणनीति तयार पार्ने निर्णय गरेको हो । यस्तो संरचनाबाट विद्यार्थीले शिक्षा सम्बन्धी सेवा, सुविधा र दीक्षान्त कार्यक्रम जस्ता सबै आवश्यक कार्यहरू आफू बसेको नजिकबाट सहज रूपमा पाउने अपेक्षा गरिएको छ ।
त्रिभुवन विश्वविद्यालयका उपकुलपति प्रा.डा. दीपक अर्यालले शिक्षा सेवाको प्रवाह सरल र प्रभावकारी बनाउने प्रयासको भाग रूपमा यो च्याप्टर स्थापना गर्ने बताएका छन् । उनले उच्च शिक्षालाई स्थानीयकरण गर्दै विद्यार्थीलाई सम्मानजनक सेवा उपलब्ध गराउने महत्वमा जोड दिएका छन् ।
विश्वविद्यालय अनुदान आयोगका अध्यक्ष प्रा.डा. देवराज अधिकारीले विश्वविद्यालयले शिक्षा सेवा व्यवस्थित पार्ने यो पहललाई समर्थन गर्दै सकारात्मक प्रतिक्रिया दिएका छन् । साथै, शिक्षा, व्यवस्थापन र प्रशासनलाई अझ प्रभावकारी बनाउने दिशामा सबै सरोकारवालालाई सहयोग र समन्वय गर्न आग्रह पनि गरेका छन् ।
गण्डकी च्याप्टरको अवधारणाले उच्च शिक्षा व्यवस्थापनलाई प्रदेशस्तरमा अधिक पहुँचयोग्य र परिणाममुखी बनाउने लक्ष्य राखेको छ । यसले गुणस्तरीय शिक्षा, अनुसन्धान र स्थानीय आवश्यकताअनुरूपको कार्यक्रम विकासमा योगदान गर्ने अपेक्षा गरिएको छ ।
