काठमाडौं — कालीमाटी फलफूल तथा तरकारी बजार विकास समितिले आजका लागि कृषिउपजको अधिकतम थोक मूल्य सार्वजनिक गरेको छ। समितिका अनुसार तरकारी, फलफूल, मसला तथा माछाजन्य वस्तुको मूल्यमा सामान्य उतारचढाव देखिएको छ।
समितिले जारी गरेको सूचीअनुसार ठूलो भारतीय गोलभेँडा प्रतिकिलो रु ९० मा कारोबार भइरहेको छ भने लोकल सानो गोलभेँडाको मूल्य रु ६५ कायम गरिएको छ। त्यस्तै आलु रातो (लाम्चो) रु २८, आलु रातो (गोलो) रु २३ तथा भारतीय प्याज प्रतिकिलो रु ३८ निर्धारण गरिएको छ।
हरियो तरकारीतर्फ स्थानीय गाजर रु ६०, बन्दा रु ४०, स्थानीय काउली रु ६० तथा सेतो मूला प्रतिकिलो रु २० मा बिक्री भइरहेको छ। भन्टा लाम्चो रु ६० र गोलो भन्टा रु ७० तोकिएको छ।
दाल तथा कोसेबालीमा बोडी (तने) रु ८०, मकै बोडी रु १००, घिउ सिमी (लोकल) रु ९५ तथा भटमास कोसा रु १४० प्रतिकिलो कायम गरिएको छ। त्यसैगरी लौका, परवर र फर्सीको मूल्य रु ४० देखि रु ७० सम्म रहेको समितिले जनाएको छ।
हरियो सागसब्जीतर्फ रायोसाग प्रतिकिलो रु १००, पालुङ्गो रु १२० तथा हरियो प्याज रु १५० पुगेको छ। च्याउको मूल्य भने अपेक्षाकृत महँगो देखिएको छ। कन्य च्याउ रु १६०, डल्ले च्याउ रु ३५० र सिताके च्याउ प्रतिकिलो रु १ हजारमा कारोबार भइरहेको छ।
फलफूलतर्फ फुजी स्याउ प्रतिकिलो रु ३००, कागती रु २८०, मालभोग केरा प्रतिदर्जन रु २२० तथा अनार प्रतिकिलो रु ५०० कायम गरिएको छ। हरियो अङ्गुर रु ३०० र कालो अङ्गुर रु ४५० तोकिएको छ। एभोकाडो प्रतिकिलो रु ८०० मा बिक्री भइरहेको छ।
मसला तथा अन्य वस्तुमा अदुवा प्रतिकिलो रु १७०, सुकेको खुर्सानी रु ४५०, अकबरे खुर्सानी रु ५०० तथा हरियो धनियाँ रु १२० कायम गरिएको छ। माछातर्फ ताजा रहु माछा प्रतिकिलो रु ३४०, बचुवा रु ३१० तथा छडी माछा रु २८० मा कारोबार भइरहेको समितिले जनाएको छ।
