८ महिनामा विकास बैंकहरूको नाफा साढे ४ अर्ब नाघ्यो, मुक्तिनाथ अग्र स्थानमा

काठमाडौं – चालु आर्थिक वर्ष २०८२/८३ को पहिलो ८ महिनामा राष्ट्रिय स्तरका विकास बैंकहरूले उल्लेखनीय नाफा आर्जन गरेका छन्। नेपाल राष्ट्र बैंक का अनुसार फागुन मसान्तसम्म सञ्चालनमा रहेका ८ विकास बैंकले कुल ४ अर्ब ५८ करोड ९७ लाख रुपैयाँ नाफा कमाएका छन्।

यो नाफा गत आर्थिक वर्षको सोही अवधिको तुलनामा ९.६२ प्रतिशतले बढी हो। अघिल्लो वर्ष यस अवधिमा बैंकहरूले ४ अर्ब १८ करोड ७० लाख रुपैयाँ नाफा कमाएका थिए। समीक्षा अवधिमा ६ बैंकको नाफा बढ्दा २ बैंकको नाफा भने घटेको देखिएको छ।

नाफाका आधारमा मुक्तिनाथ विकास बैंक शीर्ष स्थानमा रहेको छ। बैंकले ८ महिनामा ९८ करोड ३० लाख रुपैयाँ नाफा कमाएको छ, जुन अघिल्लो वर्षको तुलनामा २४.७८ प्रतिशतले बढी हो।

त्यसैगरी, गरिमा विकास बैंक दोस्रो स्थानमा छ। बैंकले ९२ करोड ८२ लाख रुपैयाँ नाफा कमाएको छ, जुन गत वर्षको ८३ करोड ३८ लाख रुपैयाँभन्दा वृद्धि हो।

अन्य बैंकहरूको प्रदर्शन पनि सकारात्मक देखिएको छ। शाइन रेसुङ्गा विकास बैंक को नाफा १५ प्रतिशतले बढेर ६५ करोड पुगेको छ भने कामना सेवा विकास बैंक ले १२.३० प्रतिशत वृद्धि गर्दै ५६ करोड २७ लाख रुपैयाँ नाफा कमाएको छ।

यस्तै, ज्योति विकास बैंक को नाफा २८.६७ प्रतिशतले बढेर ४६ करोड ३३ लाख पुगेको छ भने सांग्रिला डेभलपमेन्ट बैंक ले २.५८ प्रतिशत वृद्धि गर्दै ४१ करोड ७१ लाख रुपैयाँ नाफा आर्जन गरेको छ।

तर सबै बैंकको अवस्था समान छैन। महालक्ष्मी विकास बैंक को नाफा २९.७६ प्रतिशतले घटेर ३३ करोड ४० लाखमा सीमित भएको छ।

सबैभन्दा कम नाफा कमाउने बैंकका रूपमा लुम्बिनी विकास बैंक रहेको छ। बैंकको नाफा १९ प्रतिशतले घट्दै २५ करोड १२ लाख रुपैयाँमा झरेको छ।

समग्रमा, विकास बैंक क्षेत्रले स्थिरता कायम राख्दै नाफामा सुधार देखाएको भए पनि केही बैंकहरूमा गिरावट देखिनु चुनौतीको संकेतका रूपमा हेरिएको छ।