काठमाडौँ — नेपालमा अहिले पश्चिमी न्यून चापीय प्रणाली तथा स्थानीय वायुको प्रभाव देखिएको छ। जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार आज देशका विभिन्न स्थानमा वर्षा, हिमपात र हावाहुरीको सम्भावना रहेको छ।
महाशाखाले जनाएको अनुसार गण्डकी, कर्णाली र सुदूरपश्चिम प्रदेशका पहाडी तथा हिमाली भूभागका केही स्थानमा चट्याङसहित मध्यम वर्षा तथा हिमपात हुन सक्नेछ। साथै ती क्षेत्रका अन्य स्थानमा हल्कादेखि मध्यम वर्षाको सम्भावना रहेको छ।
त्यस्तै, कोशी, मधेस, बागमती, गण्डकी र लुम्बिनी प्रदेशका तराई भूभागका केही स्थानमा हावाहुरी चल्ने सम्भावना रहेको छ। यसले जनजीवन प्रभावित पार्न सक्ने भएकाले सतर्कता अपनाउन आग्रह गरिएको छ।
दिउँसो देशको अधिकांश पहाडी तथा हिमाली भूभागमा बदली रहनेछ भने अन्य क्षेत्रमा आंशिक बदली रहने अनुमान गरिएको छ।
आज राति पनि मौसममा खासै सुधार नआउने देखिएको छ। गण्डकी, कर्णाली र सुदूरपश्चिम प्रदेशसहित अन्य हिमाली क्षेत्रका केही स्थानमा चट्याङसहित वर्षा तथा हिमपातको सम्भावना कायमै रहनेछ।
मौसमविद्हरूले विशेषगरी पहाडी तथा हिमाली क्षेत्रमा यात्रा गर्दा सावधानी अपनाउन तथा हावाहुरी प्रभावित तराई क्षेत्रमा आवश्यक सतर्कता अपनाउन आग्रह गरेका छन्।
Leave a Reply