काठमाडौं — नेपाल दुग्धजन्य पदार्थमा आत्मनिर्भर रहेको दाबी गरिए पनि चिज (Cheese) को आयात भने निरन्तर बढिरहेको देखिएको छ । भन्सार विभागको पछिल्लो तथ्यांकअनुसार चालु आर्थिक वर्ष २०८२/८३ को साउनदेखि वैशाखसम्मको १० महिनाको अवधिमा नेपालले १७ करोड ५३ लाख ४१ हजार रुपैयाँ बराबरको चिज आयात गरेको छ ।
यस अवधिमा कुल २ लाख ६ हजार ९ सय १७ किलो चिज नेपाल भित्रिएको छ । चिज आयातबाट सरकारले ५ करोड १९ लाख ३३ हजार रुपैयाँ भन्सार महसुल संकलन गरेको तथ्यांकमा उल्लेख छ ।
नेपालमा आयात हुने चिजमध्ये सबैभन्दा ठूलो हिस्सा भारतबाट आएको देखिन्छ । १० महिनाको अवधिमा भारतबाट मात्रै १२ करोड ५८ लाख ५५ हजार रुपैयाँ बराबरको १ लाख ५९ हजार १६६ किलो चिज आयात गरिएको छ । भारतबाट विशेषगरी कोरेको, धुलो तथा सामान्य प्रयोगका चिजहरू बढी आउने गरेका छन् ।
यस्तै, युरोपेली मुलुक फ्रान्सबाट २ करोड १७ लाख १५ हजार रुपैयाँ बराबरको २० हजार ४०० किलो चिज आयात भएको छ । फ्रान्सबाट मुख्यतः महँगा तथा प्रोसेस्ड चिज नेपाल भित्रिने गरेको बताइएको छ । फ्रान्सबाट आयात भएको चिजबाट मात्रै सरकारले ६५ लाख रुपैयाँभन्दा बढी राजस्व संकलन गरेको छ ।
इटालीबाट ६ हजार २५४ किलो चिज आयात गर्दा १ करोड ३२ लाख ५६ हजार रुपैयाँ बाहिरिएको छ । यसअनुसार इटालीबाट आयात हुने चिजको औसत मूल्य प्रति किलो २ हजार १ सय रुपैयाँभन्दा बढी पर्ने देखिन्छ ।
त्यसैगरी चीनबाट ३३ लाख ४ हजार रुपैयाँ बराबरको १३ हजार ८८८ किलो चिज आयात भएको छ भने अस्ट्रेलियाबाट २२ लाख ४० हजार रुपैयाँ बराबरको ५७८ किलो चिज भित्रिएको छ ।
अन्य मुलुकमध्ये जर्मनीबाट २० लाख ९१ हजार रुपैयाँ, नेदरल्यान्ड्सबाट १६ लाख १७ हजार रुपैयाँ तथा डेनमार्कबाट ३ लाख ६८ हजार रुपैयाँ बराबरको चिज नेपाल भित्रिएको भन्सार विभागले जनाएको छ । यस्तै संयुक्त अरब इमिरेट्स (यूएई), कतार र अमेरिकाबाट पनि सीमित परिमाणमा चिज आयात हुने गरेको छ ।
