सरकारको भूमिसम्बन्धी कार्यक्रमअन्तर्गत राष्ट्रिय भूमि आयोगको समन्वय तथा स्थानीय तहको सहकार्यमा गरिएको लालपुर्जा वितरण कार्यक्रममार्फत ती परिवारलाई कानुनी रूपमा जग्गाधनीको प्रमाणपत्र हस्तान्तरण गरिएको हो। लालपुर्जा प्राप्त गरेपछि अब उनीहरूले आफ्नो जग्गामा ढुक्कसँग घर निर्माण गर्न, कृषि उत्पादन बढाउन, बैंक तथा वित्तीय संस्थाबाट आवश्यक परेमा कर्जा लिन तथा अन्य कानुनी सेवा प्राप्त गर्न सक्ने भएका छन्।
लालपुर्जा वितरण कार्यक्रममा बोल्दै स्थानीय जनप्रतिनिधिहरूले भूमिहीन नागरिकलाई जग्गाको स्वामित्व दिलाउनु सामाजिक न्याय र आर्थिक सशक्तीकरणतर्फको महत्त्वपूर्ण उपलब्धि भएको बताए। उनीहरूले अझै लालपुर्जा प्राप्त गर्न बाँकी रहेका वास्तविक भूमिहीन तथा सुकुम्बासी परिवारको पहिचान गरी प्रक्रिया छिटो टुंग्याइने प्रतिबद्धता समेत व्यक्त गरे।
लालपुर्जा प्राप्त गर्ने परिवारहरूले वर्षौंदेखि अस्थायी रूपमा बसोबास गर्दै आए पनि कानुनी स्वामित्व नहुँदा विभिन्न समस्या झेल्नुपरेको बताएका छन्। अब आफ्नै नाममा जग्गा भएपछि भविष्यप्रति आशा बढेको, सन्तानका लागि सुरक्षित आधार तयार भएको र स्थायी बसोबासको सपना पूरा भएको उनीहरूको भनाइ छ।
राष्ट्रिय भूमि आयोगले देशभरका भूमिहीन दलित, भूमिहीन सुकुम्बासी तथा अव्यवस्थित बसोबासीको लगत संकलन, नापजाँच, प्रमाणीकरण र जग्गा व्यवस्थापनको कामलाई तीव्रता दिइरहेको जनाएको छ। स्थानीय तहसँगको सहकार्यमा वास्तविक लाभग्राहीको पहिचान गरी क्रमशः लालपुर्जा वितरणलाई निरन्तरता दिइने आयोगको योजना रहेको छ।
बढैयाताल गाउँपालिकामा सम्पन्न यो लालपुर्जा वितरणलाई स्थानीयवासीले भूमिसुधार अभियानको सकारात्मक सुरुवातका रूपमा लिएका छन्। यसले भूमिहीन नागरिकलाई कानुनी अधिकार दिलाउनुका साथै आर्थिक तथा सामाजिक रूपमा आत्मनिर्भर बन्ने आधार तयार गर्ने विश्वास गरिएको
