काठमाडौं— देशभर हाल पश्चिमी न्यून चापीय प्रणालीसँगै स्थानीय वायुको आंशिक प्रभाव कायम रहेको छ। मौसम पूर्वानुमान महाशाखाका अनुसार यसको असरले पहाडी तथा हिमाली क्षेत्रमा सामान्यदेखि आंशिक बदली देखिएको छ भने तराई क्षेत्रमा मौसम आंशिकदेखि मुख्यतया सफा रहेको छ।
आज दिउँसो कोशी, बागमती र गण्डकी प्रदेशका हिमाली भूभागमा सामान्य बदली रहने अनुमान गरिएको छ। कोशी प्रदेशका पहाडी र तराई क्षेत्रसहित अन्य पहाडी तथा हिमाली भूभागमा आंशिक बदली रहनेछ भने बाँकी तराई क्षेत्रमा मौसम प्रायः सफा रहने जनाइएको छ।
मौसमविद्हरूका अनुसार कोशी प्रदेशका पहाडी तथा हिमाली क्षेत्र र बागमती तथा गण्डकी प्रदेशका हिमाली भूभागका एक–दुई स्थानमा हल्का वर्षा तथा हिमपातको सम्भावना रहेको छ। साथै, लुम्बिनी र सुदूरपश्चिम प्रदेशका तराई क्षेत्रमा केही स्थानमा हावाहुरी चल्न सक्ने चेतावनी दिइएको छ।
आज रातिको मौसम पूर्वानुमान अनुसार कोशी प्रदेशका पहाडी तथा हिमाली भूभागमा सामान्य बदली रहनेछ भने बागमती, गण्डकी र कर्णाली प्रदेशका हिमाली क्षेत्रमा आंशिक बदली रहनेछ। कोशी र गण्डकी प्रदेशका हिमाली भूभागका थोरै स्थानमा पुनः हल्का वर्षा र हिमपात हुने सम्भावना रहेको महाशाखाले जनाएको छ।
मौसममा आएको यस परिवर्तनका कारण उच्च पहाडी तथा हिमाली क्षेत्रका बासिन्दालाई सतर्कता अपनाउन र तराई क्षेत्रमा हावाहुरीबाट हुन सक्ने क्षतिबाट जोगिन आवश्यक सावधानी अपनाउन आग्रह गरिएको छ।
