बिहिबार बिहानदेखि नै मौसमका आएको परिर्वतनले उपत्यका सहित देशका विभिन्न स्थानमा दिनभरजसो पानी परिरह्यो। पश्चिमी न्यून चापीय प्रणाली र स्थानीय वायुको प्रभावका कारण काठमाडौं उपत्यकासहित देशका विभिन्न स्थानमा वर्षा भएको छ।
आफ्नो कामका लागि घरबाहिर निस्किएका सर्वसाधारण वर्षाका कारण प्रभावित भए । मौसमको पूर्वानुमान थाहा पाएका केही मानिस छाता र रेनकोटसहित गन्तव्यतर्फ लागेका देखिन्थे भने कतिपय बिना तयारी भिज्दै सडकमा हिँड्न बाध्य भए। मौसम पूर्वानुमान महाशाखाका अनुसार देशका पहाडी तथा हिमाली क्षेत्रका केही स्थानमा मेघगर्जन र चट्याङसहित हल्का वर्षा तथा हिमपात भइरहेको छ।
गण्डकी, लुम्बिनी, कर्णाली र सुदूरपश्चिम प्रदेशमा पूर्ण बदली रह्यो भने अन्य क्षेत्रहरूमा आंशिक बदली देखियो। ती प्रदेशका धेरै स्थानमा तथा कोशी र बागमती प्रदेशका पहाडी तथा हिमाली भूभागका केही स्थानमा, साथै मधेश, कोशी र बागमतीका तराई क्षेत्रमा समेत मेघगर्जन, चट्याङ, हुरी र असिनासहित मध्यम वर्षा भएको महाशाखाले जनाएको छ।
आज राति देशभर सामान्यदेखि पूर्ण बदली रहने अनुमान गरिएको छ। कोशी, मधेश, लुम्बिनी, कर्णाली र सुदूरपश्चिम प्रदेशका साथै पहाडी तथा हिमाली क्षेत्रमा धेरै स्थानमा र तराईका केही भूभागमा मेघगर्जन तथा चट्याङसहित, हुरी र असिनासहित मध्यम वर्षा तथा हिमपात हुन सक्ने सम्भावना रहेको छ। सर्वसाधारण तथा यातायात सञ्चालनमा संलग्न सबैलाई सतर्कता अपनाउन महाशाखाले आग्रह गरेको छ।
