काठमाडौं — नेपालमा अहिले पश्चिमी वायु तथा स्थानीय वायुको संयुक्त प्रभावका कारण मौसममा उल्लेखनीय परिवर्तन देखिएको छ। जल तथा मौसम विज्ञान विभाग, मौसम पूर्वानुमान महाशाखाका अनुसार देशका अधिकांश पहाडी तथा हिमाली भू-भागमा बदली रही केही स्थानमा वर्षा भइरहेको छ।
हाल गण्डकी, कर्णाली र सुदूरपश्चिम प्रदेशका पहाडी तथा हिमाली क्षेत्रमा मेघगर्जन र चट्याङसहित हल्का वर्षा भइरहेको छ। अन्य क्षेत्रहरूमा भने आंशिक बदलीको अवस्था कायम रहेको विभागले जनाएको छ।
महाशाखाका अनुसार आज दिउँसो र राति पनि मौसममा थप सक्रियता देखिने सम्भावना छ। विशेषगरी कोशी, बागमती र गण्डकी प्रदेशका पहाडी तथा हिमाली भू-भागका केही स्थानमा मध्यम वर्षा हुने अनुमान गरिएको छ। यससँगै उच्च हिमाली क्षेत्रमा हल्का हिमपातको सम्भावना पनि रहेको छ।
त्यस्तै, मधेश प्रदेशका केही भू-भागसहित कोशी प्रदेशको तराई क्षेत्र तथा लुम्बिनी, कर्णाली र सुदूरपश्चिमका पहाडी क्षेत्रमा पनि मेघगर्जन र चट्याङसहित वर्षा हुन सक्ने पूर्वानुमान गरिएको छ।
विभागले देशभर आंशिकदेखि सामान्य बदलीको अवस्था कायम रहने र पहाडी क्षेत्रमा बादल लाग्ने क्रम जारी रहने जनाएको छ। मौसममा आएको यस परिवर्तनका कारण दैनिक जनजीवनमा सामान्य प्रभाव पर्न सक्ने भएकाले आवश्यक सतर्कता अपनाउन नागरिकलाई आग्रह गरिएको छ।
