काठमाडौं — नेपाल राष्ट्र बैंक द्वारा सार्वजनिक गरिएको पछिल्लो तथ्याङ्कअनुसार चालु आर्थिक वर्ष २०८२/८३ को पहिलो आठ महिनामा अन्तर बैंक कारोबारमा उल्लेखनीय गिरावट आएको छ।
उक्त अवधिमा कुल ७ खर्ब ४३ अर्ब ८६ करोड रुपैयाँ बराबरको अन्तर बैंक कारोबार भएको छ, जुन अघिल्लो आर्थिक वर्षको सोही अवधिको तुलनामा झन्डै आधाले कम हो।
तथ्याङ्कअनुसार वाणिज्य बैंकहरूबीच मात्रै ६ खर्ब २९ अर्ब ७१ करोड रुपैयाँको कारोबार भएको छ भने अन्य वित्तीय संस्थाहरूबीच (वाणिज्य बैंक बाहेक) १ खर्ब १४ अर्ब १५ करोड रुपैयाँको कारोबार भएको देखिन्छ।
यसअघि, आर्थिक वर्ष २०८१/८२ को सोही अवधिमा वाणिज्य बैंकहरूको ११ खर्ब ६२ अर्ब ७१ करोड र अन्य वित्तीय संस्थाहरूको १ खर्ब ३० अर्ब ३८ करोड गरी कुल १२ खर्ब ९३ अर्ब ९ करोड रुपैयाँ बराबरको अन्तर बैंक कारोबार भएको थियो।
विश्लेषकहरूका अनुसार बैंकिङ प्रणालीमा तरलता व्यवस्थापन, कर्जा प्रवाहको सुस्तता तथा बजारमा माग घट्नु जस्ता कारणले अन्तर बैंक कारोबारमा गिरावट आएको हुन सक्छ। साथै, वित्तीय संस्थाहरूबीचको अल्पकालीन ऋण आवश्यकतामा कमी आउनु पनि यस गिरावटको प्रमुख कारण मानिएको छ।
अन्तर बैंक कारोबार बैंक तथा वित्तीय संस्थाहरूबीच अल्पकालीन तरलता व्यवस्थापनका लागि महत्वपूर्ण माध्यम मानिन्छ। यसमा आएको गिरावटले समग्र बैंकिङ गतिविधिमा सुस्तता आएको संकेत गर्ने विज्ञहरूको भनाइ छ।
Leave a Reply