भारतको बजार नियामक Securities and Exchange Board of India (SEBI) (सेबी) ले सुन व्यवसायी कम्पनी Rajesh Exports का प्रवर्द्धक Rajesh Mehta माथि गम्भीर वित्तीय अनियमितताको आरोप लगाउँदै पूँजी बजारमा कारोबार गर्न अस्थायी प्रतिबन्ध लगाएको छ।
सेबीका अनुसार कम्पनीले सन् २०२० देखि २०२५ सम्म करिब १५.१५ लाख करोड भारतीय रुपैयाँ बराबरको राजस्व (Revenue) बढाइचढाइ देखाएको हुन सक्ने आशंका छ। नियामकले कम्पनीको स्विस सहायक इकाइको वास्तविक वित्तीय विवरण र समूहस्तरीय आम्दानीबीच ठूलो अन्तर भेटिएको जनाएको छ।
अनुसन्धानमा केही कारोबार, सम्पत्ति मूल्यांकन तथा कोषको आवतजावतसम्बन्धी विवरणहरू पर्याप्त रूपमा खुलासा नगरिएको दाबी गरिएको छ। सेबीले कम्पनीको वित्तीय विवरणमा गम्भीर विसंगति रहेको भन्दै थप अनुसन्धान जारी राखेको जनाएको छ।
यद्यपि, राजेश एक्सपोर्ट्सले सबै आरोप अस्वीकार गर्दै सेबीको आदेश अन्तरिम प्रकृतिको मात्र भएको र तथ्यहरूको गलत व्याख्या गरिएको दाबी गरेको छ। कम्पनीले आफ्नो वित्तीय विवरण सही रहेको तथा अनुसन्धानमा पूर्ण सहयोग गर्ने जनाएको छ।
यो प्रकरण भारतको शेयर बजार इतिहासकै सबैभन्दा ठूलो सम्भावित लेखा–अनियमितता घटनामध्ये एक हुन सक्ने भन्दै लगानीकर्ता तथा बजार विश्लेषकहरूको ध्यान आकर्षित भएको छ।
