पश्चिमी वायुको प्रभाव कायम : चार प्रदेशमा चट्याङ्गसहित वर्षाको सम्भावना

काठमाडौं — नेपालमा हाल पश्चिमी वायु र स्थानीय वायुको प्रभाव कायम रहेकाले देशका विभिन्न भूभागमा मौसम बदली भई वर्षाको सम्भावना रहेको छ। मौसम पूर्वानुमान महाशाखाका अनुसार अहिले देशका पहाडी तथा हिमाली क्षेत्रमा सामान्यदेखि आंशिक बदली रहेको छ भने तराईका अधिकांश क्षेत्रमा मौसम मुख्यतया सफा रहेको छ।

महाशाखाले जारी गरेको पूर्वानुमानअनुसार आज दिउँसो कोशी, मधेस, बागमती र गण्डकी प्रदेशका केही स्थानमा चट्याङ्गसहित हल्कादेखि मध्यम वर्षाको सम्भावना रहेको छ। साथै लुम्बिनी र कर्णाली प्रदेशका हिमाली तथा पहाडी भूभागमा पनि वर्षा र हिमपात हुन सक्ने जनाइएको छ।

यस्तै, बाँकी पहाडी तथा हिमाली क्षेत्रमा आंशिक बदली रहनेछ भने तराईका अधिकांश भूभागमा मौसम सफा रहने पूर्वानुमान गरिएको छ। सुदूरपश्चिम र लुम्बिनी प्रदेशका तराई क्षेत्रमा तातो दिनको अवस्था कायम रहने सम्भावना रहेको महाशाखाले जनाएको छ।

आज राति पनि कोशी, मधेस, बागमती र गण्डकी प्रदेशमा सामान्य बदली रहनेछ। ती प्रदेशका एक–दुई स्थानमा चट्याङ्गसहित हल्का वर्षा र हिमपातको सम्भावना रहेको मौसमविद्ले बताएका छन्।

मौसमविद्ले चट्याङ्ग तथा वर्षाका कारण हुन सक्ने सम्भावित जोखिमबाट सतर्क रहन सर्वसाधारणलाई आग्रह गरेका छन्।