काठमाडौं । संघीय संसद्मा प्रस्तुत भएको आगामी आर्थिक वर्ष २०८३/८४ को नीति तथा कार्यक्रममाथिको छलफल आज निष्कर्षमा पुग्ने भएको छ । संसद बैठकमा उठेका जिज्ञासा र सुझावमाथि प्रधानमन्त्री बालेन शाहले जवाफ दिने कार्यसूची तय गरिएको छ ।
राष्ट्रपति रामचन्द्र पौडेलले केही दिनअघि संघीय संसद्को संयुक्त बैठकमा सरकारको वार्षिक नीति तथा कार्यक्रम प्रस्तुत गरेका थिए । त्यसपछि प्रतिनिधिसभा र राष्ट्रियसभामा यस विषयमा छलफल जारी रहेको छ ।
संघीय संसद सचिवालयका अनुसार आजको बैठकमा सांसदहरूले दर्ता गराएका संशोधन प्रस्तावमाथि निर्णय गरिनेछ । त्यसपछि नीति तथा कार्यक्रमलाई अनुमोदनका लागि सभामा प्रस्तुत गर्ने तयारी गरिएको छ ।
छलफलका क्रममा विभिन्न दलका सांसदहरूले आर्थिक सुधार, रोजगारी, विकास निर्माण, शिक्षा, स्वास्थ्य र सार्वजनिक सेवा प्रवाहका विषय उठाएका छन् । विपक्षी दलहरूले केही योजनाको कार्यान्वयन क्षमता र बजेट व्यवस्थापनबारे प्रश्न उठाएका छन् भने सत्तापक्षले नीति तथा कार्यक्रमलाई विकासमुखी दस्तावेजको रूपमा प्रस्तुत गरेको छ ।
प्रधानमन्त्रीको जवाफपछि संसद्ले नीति तथा कार्यक्रम पारित गर्ने सम्भावना रहेको बताइएको छ ।
