काठमाडौं — नेपाल राष्ट्र बैंकले वित्तीय प्रणालीमा देखिएको अधिक तरलता व्यवस्थापन गर्न १ खर्ब २० अर्ब रुपैयाँ बजारबाट खिच्ने भएको छ। केन्द्रीय बैंकले १९ दिन अवधिको निक्षेप संकलन उपकरण (Deposit Collection Instrument) मार्फत उक्त रकम संकलन गर्ने तयारी गरेको हो।
राष्ट्र बैंकका अनुसार उक्त निक्षेप संकलनका लागि आज दिउँसो ३ बजे बोलकबोल प्रक्रिया सञ्चालन हुनेछ। बैंक तथा वित्तीय संस्थाहरूलाई तरलता व्यवस्थापनको उद्देश्यले यस उपकरणमा सहभागी हुन आह्वान गरिएको छ।
यस बोलकबोलमा वाणिज्य बैंक, विकास बैंक तथा वित्त कम्पनीहरू सहभागी हुन सक्नेछन्। सहभागी संस्थाहरूले न्यूनतम १० करोड रुपैयाँदेखि अधिकतम बोलकबोल रकमसम्म प्रस्ताव गर्न सक्ने व्यवस्था गरिएको छ। बोलकबोल रकम ५ करोडले भाग गर्दा निःशेष हुने गरी प्रस्तुत गर्नुपर्नेछ।
निक्षेप संकलन प्रक्रिया ब्याजदरका आधारमा हुनेछ भने बहु ब्याजदरमा पनि प्रस्ताव गर्न सकिने राष्ट्र बैंकले जनाएको छ। ‘क’, ‘ख’ र ‘ग’ वर्गका बैंक तथा वित्तीय संस्थाहरू मात्र यस प्रक्रियामा सहभागी हुन पाउनेछन्।
उक्त निक्षेप संकलन उपकरणको परिपक्वता अवधि १९ दिन रहेको छ भने यसको साँवा तथा ब्याज भुक्तानी यही महिनाको ३० गते गरिने राष्ट्र बैंकले स्पष्ट पारेको छ।
तरलता व्यवस्थापनका लागि केन्द्रीय बैंकले नियमित रूपमा यस्ता उपकरण प्रयोग गर्दै आएको छ, जसको उद्देश्य वित्तीय प्रणालीमा स्थिरता कायम राख्नु हो।
Leave a Reply