काठमाडौं । हिन्दी चलचित्र उद्योगका चर्चित निर्माता तथा भारतको केन्द्रीय फिल्म प्रमाणन बोर्ड (सीबीएफसी) का पूर्व अध्यक्ष पहलाज निहलानीको ७६ वर्षको उमेरमा निधन भएको छ। उनी केही समयदेखि स्वास्थ्य समस्यासँग जुधिरहेका थिए र उपचारका क्रममा उनको मृत्यु भएको बताइएको छ।
चार दशकभन्दा लामो समय चलचित्र क्षेत्रमा सक्रिय रहेका निहलानीले अनेक सफल व्यावसायिक फिल्म निर्माण गरेका थिए। उनले निर्माण गरेका चलचित्रहरूले बलिउडमा विशेष छाप छोडेका छन्। साथै, कलाकार गोविन्दा र चंकी पाण्डेजस्ता कलाकारको प्रारम्भिक फिल्म यात्रासँग पनि उनको नाम जोडिएको छ।
चलचित्र निर्माणसँगै उनी सन् २०१५ देखि २०१७ सम्म सीबीएफसीको अध्यक्षका रूपमा समेत कार्यरत रहे। उनको कार्यकाल फिल्म प्रमाणीकरण र सेन्सरसिपसम्बन्धी बहसका कारण निकै चर्चामा रह्यो।
निहलानीको निधनसँगै भारतीय चलचित्र उद्योगले अनुभवी निर्माता र प्रभावशाली व्यक्तित्व गुमाएको प्रतिक्रिया कलाकार तथा फिल्मकर्मीहरूले जनाएका छन्। उनको योगदानलाई स्मरण गर्दै विभिन्न क्षेत्रबाट श्रद्धाञ्जली व्यक्त गर्ने क्रम जारी छ।
परिवार स्रोतका अनुसार उनको अन्त्येष्टि मुम्बईमा सम्पन्न गरिनेछ।
Leave a Reply