काठमाडौं – नेपाल आयल निगमले पेट्रोलियम पदार्थको मूल्य वृद्धि गरेको छ। निगमले सार्वजनिक गरेको नयाँ मूल्यसूची अनुसार पेट्रोल, डिजेल र मट्टितेलको मूल्य सोमबार राति १२ बजेपछि लागू हुने भएको छ।
नयाँ समायोजन अनुसार पेट्रोलको मूल्य प्रतिलिटर एक रुपैयाँले बढाइएको छ भने डिजेल र मट्टितेलको मूल्य प्रतिलिटर तीन रुपैयाँले वृद्धि गरिएको निगमले जनाएको छ।
नयाँ मूल्यसूची अनुसार पेट्रोलको मूल्य पहिलो वर्गमा १५४ रुपैयाँ ५० पैसा, दोस्रो वर्गमा १६५ रुपैयाँ र तेस्रो वर्गमा १५७ रुपैयाँ कायम गरिएको छ।
त्यस्तै डिजेल र मट्टितेलको मूल्य पहिलो वर्गमा १३९ रुपैयाँ ५० पैसा, दोस्रो वर्गमा १४१ रुपैयाँ र तेस्रो वर्गमा १४२ रुपैयाँ निर्धारण गरिएको छ।
निगमका अनुसार पहिलो वर्गअन्तर्गत चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्ज पर्छन्। दोस्रो वर्गमा सुर्खेत र दाङ रहेका छन् भने तेस्रो वर्गमा काठमाडौं, पोखरा र दिपायल समावेश छन्।
मूल्यवृद्धिपछि उपभोक्तामा थप आर्थिक भार पर्ने भएको छ। निगमले अन्तर्राष्ट्रिय बजार मूल्य तथा ढुवानी खर्चका आधारमा मूल्य समायोजन गरिएको जनाएको छ।
Leave a Reply