काठमाडौं — पछिल्लो २४ घण्टामा चितवनसहित देशका विभिन्न स्थानमा अति भारी वर्षा भएको छ ।
जल तथा मौसम विज्ञान विभागको मौसम पूर्वानुमान महाशाखाका अनुसार चितवनको माडी कल्यानपुर मापन केन्द्रमा २२२.४ मिलिमिटर वर्षा भएको छ । यो अवधिमा उक्त केन्द्रमा सबैभन्दा धेरै वर्षा मापन भएको हो ।
त्यस्तै, नवलपरासीको बर्दघाट मापन केन्द्रमा २०७ मिलिमिटर, चितवनको मेघौलीमा २०२.८ मिलिमिटर र तनहुँको अत्रौलीटारमा २०२.२ मिलिमिटर वर्षा मापन भएको विभागले जनाएको छ ।
२४ घण्टामा २०० मिलिमिटरभन्दा बढी वर्षा हुनुलाई अति भारी वर्षा मानिन्छ । १०० देखि २०० मिलिमिटरसम्मलाई धेरै भारी र ५० देखि १०० मिलिमिटरसम्मलाई भारी वर्षा मान्ने गरिन्छ ।
विभागका अनुसार मधेश प्रदेशसहित गण्डकी, लुम्बिनी, बागमती र सुदूरपश्चिम प्रदेशका केही स्थानमा भारीदेखि धेरै भारी वर्षा भएको छ । कोशी र कर्णाली प्रदेशका धेरै स्थानमा भने हल्कादेखि मध्यम वर्षा भएको छ ।
आजदेखि भने मौसममा क्रमिक सुधार आउने पूर्वानुमान गरिएको छ । कोशी र मधेश प्रदेशमा आकाश खुल्दै जाने तथा काठमाडौं उपत्यकामा पनि मौसममा उल्लेख्य सुधार हुने महाशाखाले जनाएको छ ।
Leave a Reply