काठमाडौं — पशुपति क्षेत्र विकास कोष ले यस वर्षको महाशिवरात्रि पर्वका लागि आवश्यक सम्पूर्ण तयारी अन्तिम चरणमा पुगेको जानकारी दिएको छ। कोषका अनुसार फागुन ३ गते मनाइने महाशिवरात्रिका अवसरमा करिब ८ लाख श्रद्धालुले पशुपतिनाथ मन्दिर मा दर्शन गर्ने अनुमान गरिएको छ।
यस पर्वमा स्वदेश तथा विदेशबाट गरी करिब ४ हजार साधुसन्तहरूको सहभागिता रहने अपेक्षा गरिएको छ। पर्वलाई मर्यादित, सुरक्षित र व्यवस्थित बनाउन सुरक्षा निकायसँग समन्वय गरी विशेष सुरक्षा प्रबन्ध मिलाइएको कोषले जनाएको छ। साथै, ट्राफिक व्यवस्थापनलाई प्रभावकारी बनाउन छुट्टै योजना कार्यान्वयनमा ल्याइएको छ।
दर्शनार्थीको भीड व्यवस्थापन र सहज आवागमनका लागि यस वर्ष चारवटा प्रवेश मार्ग निर्धारण गरिएको छ। मैतीदेवी, बत्तिसपुतली तथा पुरानो बानेश्वर क्षेत्रबाट आउने भक्तजनलाई गौशाला–पिंगलास्थान गेट हुँदै प्रवेश गराइनेछ।
त्यस्तै, भक्तपुर, ललितपुर, कोटेश्वर र तीनकुने क्षेत्रबाट आउनेहरूका लागि राम मन्दिर–आर्यघाट मार्ग प्रयोग गर्न व्यवस्था मिलाइएको छ। जोरपाटी, कपन र चाबहिल क्षेत्रबाट आउने दर्शनार्थीहरूलाई गौरिघाट मार्गबाट प्रवेश दिइनेछ भने रातोपुल–कालोपुलतर्फबाट आउनेहरू जयबागेश्वरी मन्दिरतर्फको बाटो प्रयोग गरी मन्दिर परिसरमा प्रवेश गर्न सक्नेछन्।
कोषले पर्व अवधिभर दर्शनलाई छिटोछरितो र व्यवस्थित बनाउन स्वयंसेवक परिचालन, स्वास्थ्य सहायता केन्द्र तथा आवश्यक सेवा–सुविधाको व्यवस्थासमेत गरिएको जनाएको छ।
Leave a Reply