यो साता ४८ सय रुपैयाँले बढ्यो सुनको मूल्य

काठमाडौं — नेपाली बजारमा यस साता सुनको मूल्य समग्रमा ४ हजार ८ सय रुपैयाँले वृद्धि भएको छ। साताको सुरुवातमा लगातार घटेको सुनको मूल्य पछिल्ला दिनमा भने उल्लेख्य रूपमा बढेको हो।

आइतबार प्रतितोला सुनको मूल्य १ हजार रुपैयाँले घट्दै २ लाख ९५ हजार १ सय रुपैयाँमा कारोबार भएको थियो। त्यसपछि सोमबार पनि सुनको मूल्य ३ सय रुपैयाँले घटेर प्रतितोला २ लाख ९४ हजार ८ सय रुपैयाँमा कायम भयो।

सुनको मूल्यमा गिरावट मंगलबार पनि जारी रह्यो। त्यसदिन प्रतितोला ३ हजार ८ सय रुपैयाँले घट्दै सुनको मूल्य २ लाख ९१ हजार रुपैयाँमा झरेको थियो। तर बुधबारदेखि बजारमा पुनः उछाल देखियो। बुधबार मात्रै प्रतितोला ५ हजार ८ सय रुपैयाँले बढ्दै सुनको मूल्य २ लाख ९६ हजार ८ सय रुपैयाँ पुगेको थियो।

त्यसैगरी बिहीबार पनि सुनको मूल्यमा वृद्धि जारी रहँदा प्रतितोला १ हजार ८ सय रुपैयाँले बढेर २ लाख ९८ हजार ६ सय रुपैयाँ कायम भयो। शुक्रबार थप १ हजार ३ सय रुपैयाँले वृद्धि भएसँगै सुनको मूल्य प्रतितोला २ लाख ९९ हजार ९ सय रुपैयाँ पुगेको छ।

लगातारको उतारचढावबीच साताको अन्त्यसम्म आइपुग्दा नेपाली बजारमा सुनको मूल्यमा समग्र रूपमा ४ हजार ८ सय रुपैयाँको वृद्धि देखिएको छ। बजार विश्लेषकहरूले अन्तर्राष्ट्रिय बजारको प्रभाव, डलर विनिमय दर तथा लगानीकर्ताको मागका कारण सुनको मूल्यमा उतारचढाव आएको बताएका छन्।