काठमाडौँ — देशभर पश्चिमी वायु र स्थानीय वायुको प्रभाव कायमै रहँदा आज केही प्रदेशमा मौसम बदली भई वर्षा र हिमपातको सम्भावना देखिएको छ। जल तथा मौसम विज्ञान विभागअन्तर्गत मौसम पूर्वानुमान महाशाखाका अनुसार हाल गण्डकी, कर्णाली र सुदूरपश्चिम प्रदेशका हिमाली भूभागमा सामान्य बदली छ भने अन्य क्षेत्रमा आंशिक बदली रहेको छ।
महाशाखाले जनाएअनुसार आज दिउँसो देशका अधिकांश हिमाली तथा पहाडी भूभागमा बदली रहनेछ। विशेषगरी गण्डकी र कर्णाली प्रदेशका हिमाली क्षेत्रमा केही स्थानमा चट्याङ्गसहित हल्का वर्षा तथा हिमपात हुने सम्भावना रहेको छ। अन्य हिमाली तथा पहाडी क्षेत्रमा पनि एक–दुई स्थानमा यस्तै प्रकृतिको मौसम देखिन सक्ने अनुमान गरिएको छ।
यसैगरी तराई क्षेत्रका केही स्थानमा हावाहुरी चल्ने सम्भावना रहेकोले सतर्कता अपनाउन महाशाखाले आग्रह गरेको छ। मौसमको यो प्रभावले दैनिक जनजीवन, विशेषगरी यातायात र कृषि क्षेत्रमा सामान्य असर पार्न सक्ने देखिएको छ।
आज राति पनि गण्डकी, कर्णाली र सुदूरपश्चिम प्रदेशका पहाडी तथा हिमाली भूभागमा सामान्य बदली रहनेछ भने अन्य क्षेत्रमा आंशिक बदली रहने पूर्वानुमान गरिएको छ। कोशी, गण्डकी र कर्णाली प्रदेशका हिमाली क्षेत्रमा हल्का वर्षा र हिमपातको सम्भावना कायम रहने महाशाखाले जनाएको छ।
Leave a Reply