काठमाडौं — देशभर हाल पश्चिमी वायु र स्थानीय वायुको आंशिक प्रभाव कायम रहेको मौसम पूर्वानुमान महाशाखाले जनाएको छ। यस प्रभावका कारण विभिन्न प्रदेशका पहाडी तथा हिमाली भूभागमा मौसममा बदली देखिएको छ।
महाशाखाका अनुसार हाल लुम्बिनी र सुदूरपश्चिम प्रदेशसहित देशका अधिकांश पहाडी क्षेत्रमा सामान्य बदली रहेको छ भने अन्य भूभागमा मौसम मुख्यतया सफा रहेको छ।
आज दिउँसो कोशी र मधेस प्रदेशसहित देशका पहाडी तथा हिमाली क्षेत्रमा सामान्यदेखि आंशिक बदली रहनेछ। ती क्षेत्रका केही स्थानहरूमा चट्याङ्ग र असिनासहित मध्यम वर्षाको सम्भावना रहेको छ। साथै उच्च हिमाली क्षेत्रमा हिमपातको समेत सम्भावना औंल्याइएको छ।
आज राति पनि कोशी प्रदेशलगायत हिमाली क्षेत्रमा सामान्य बदली रहनेछ भने पहाडी भूभागमा आंशिक बदली रहने जनाइएको छ। तराई क्षेत्रमा भने मौसम मुख्यतया सफा रहनेछ।
मौसमविद्का अनुसार कोशी, बागमती, गण्डकी र कर्णाली प्रदेशका हिमाली भूभागका एक–दुई स्थानमा चट्याङ्गसहित हल्का वर्षा तथा हिमपात हुन सक्ने भएकाले सतर्कता अपनाउन आग्रह गरिएको छ।
महाशाखाले विशेषगरी पहाडी र हिमाली क्षेत्रमा बसोबास गर्ने नागरिकलाई चट्याङ्ग र खराब मौसमबाट जोगिन आवश्यक सावधानी अपनाउन अनुरोध गरेको छ।
Leave a Reply