काठमाडौँ । खाद्य प्रविधि तथा गुण नियन्त्रण विभागले खाद्य आयात, निर्यात तथा गुणस्तर नियमन सम्बन्धी नियमहरू कडा बनाएको बताएको छ । विभागले बिहीबार सार्वजनिक गरेको आर्थिक वर्ष २०८२/८३ को अर्धवार्षिक विवरणमा आयात अनुमति कार्यदेखि गुणस्तर परीक्षणसम्मका सबै प्रक्रियामा कडाइ गरिएको जानकारी दिइएको छ ।
विभागले चालु आर्थिक वर्षको पहिलो छ महिनामा ७ हजार ८ सय ७३ वटा खाद्य पदार्थका आयात अनुमतिपत्र जारी गरेको भए पनि आवश्यक कागजात अधूरो भएका, पूर्ण लेबल नभएका तथा मापदण्ड पूरा नगरेका २२९ वटा कन्साइन्मेन्ट (ढुवानीका पार्सल) को अनुमति खारेज गरेको प्रवक्ता डा. बालकुमारी शर्माले जनाइन् । यसले नियमनमा थप कडाइ बढेको संकेत दिएको विभागले जनाएको छ ।
विभागले आयात अनुमति पत्र सेवा अनलाइनमार्फत नेपाल राष्ट्रिय एकद्वार प्रणालीद्वारा (one-door) प्रदान गरिरहेको उल्लेख गर्दै यसबाट प्रक्रियामा पारदर्शिता र छिटो सेवा सुनिश्चित हुने बताएको छ ।
निर्यातका लागि पनि विभागले प्रयोगशाला परीक्षण र स्वास्थ्य प्रमाणपत्र (हेल्थ सर्टिफिकेट) जारी गरी खाद्य वस्तुहरूको गुणस्तर सुनिश्चित गर्दै निर्यातलाई सहज बनाएको जानकारी दिइएको छ । यस अन्तर्गत छुर्पी, चिउरा, अचार, मसला पदार्थ, ताजा अदुवा, मह, प्रशोधित वनस्पति तेल, चिया र कफी जस्ता वस्तुहरूको निर्यात प्रमाणपत्र जारी गरिएको विभागले जनाएको छ ।
यस्तै, आयात हुने तरकारी तथा फलफूलमा विषादी परीक्षणमा पनि कडाइ दिइएको छ । विभागले आरविपिआर (Rapid PCR) विधिबाट कडाइपूर्वक परीक्षण गरेकोमा ३४ हजार ८५५ नमूनामा १९ नमूना प्रतिकूल फेला परेको जानकारी दिएको छ । उपत्यकाका मुख्य तरकारी–फलफूल बजारबाट संकलित १ हजार २५३ नमूनामा पनि विविध परीक्षण गरिएको विभागले उल्लेख गरेको छ ।
खाद्य नियमनको यो कदमले उपभोक्तालाई सुरक्षित र गुणस्तरीय खाद्य सामग्री उपलब्ध गराउने लक्ष्य राख्दै खाद्य सुरक्षा मापदण्डहरू कडा प्रतिपालन गराउने दिशामा सरकारको प्रतिबद्धता झल्काएको विश्लेषकहरूको भनाइ छ ।
Leave a Reply