सुनको मूल्य बढ्यो, चाँदीको मूल्य घट्यो

काठमाडौं – नेपाली बजारमा आज सुनको मूल्य बढेको छ भने चाँदीको मूल्य घटेको छ। नेपाल सुनचाँदी व्यवसायी महासङ्घले सोमबारका लागि तोकेको नयाँ मूल्यअनुसार सुनको मूल्यमा सामान्य वृद्धि भएको हो।

महासङ्घका अनुसार सोमबारका लागि छापावाल सुनको मूल्य प्रतितोला ३ लाख ९ हजार ५०० रुपैयाँ निर्धारण गरिएको छ। अघिल्लो दिन आइतबार सुनको मूल्य प्रतितोला ३ लाख ९ हजार ४०० रुपैयाँ रहेको थियो। यससँगै आज सुनको मूल्य प्रतितोला १०० रुपैयाँले बढेको हो।

त्यस्तै, चाँदीको मूल्य भने घटेको छ। सोमबारका लागि चाँदीको मूल्य प्रतितोला ५ हजार २७० रुपैयाँ कायम गरिएको छ। आइतबार चाँदीको मूल्य प्रतितोला ५ हजार २७५ रुपैयाँ रहेको थियो।

अन्तर्राष्ट्रिय बजारमा हुने उतारचढाव, मुद्रा विनिमय दर तथा माग–आपूर्तिको अवस्थाका आधारमा नेपाली बजारमा सुनचाँदीको मूल्य निर्धारण हुने गरेको महासङ्घले जनाएको छ।