काठमाडौं – गाजामा इजरायलले गरेको हवाई आक्रमणमा कम्तीमा सात जनाको मृत्यु भएको छ भने कैयौँ घाइते भएका छन्। गाजाको नागरिक रक्षा उद्धार सेवाका अनुसार आक्रमण मध्य गाजाको अल–बुरेज शरणार्थी शिविर नजिकै गरिएको हो, जहाँ प्रहरी चौकी आसपास दुईवटा क्षेप्यास्त्र प्रहार गरिएको बताइएको छ।
मध्य गाजास्थित अल–अक्सा अस्पतालले छ जनाको शव प्राप्त गरेको जनाएको छ। साथै, सात जना घाइते उपचारका लागि अस्पताल ल्याइएकोमा चार जनाको अवस्था गम्भीर रहेको चिकित्सकहरूले बताएका छन्। त्यस्तै, नजिकैको अल–अवदा अस्पतालमा एक जनाको मृत्यु हुनुका साथै दुई जना घाइतेको उपचार भइरहेको जानकारी दिइएको छ।
सन् २०२३ देखि सुरु भएको इजरायल–हमास द्वन्द्वबीच जारी तनावका क्रममा पछिल्लो समय युद्धविरामको उल्लङ्घन भएको आरोप दुवै पक्षले एक–अर्कामाथि लगाउँदै आएका छन्। विशेषगरी अक्टोबर १० देखि लागू गरिएको युद्धविरामपछि पनि हिंसात्मक घटनाहरू रोकिएका छैनन्।
गाजाको स्वास्थ्य मन्त्रालयका अनुसार युद्धविराम सुरु भएदेखि अहिलेसम्म कम्तीमा ७३८ प्यालेस्टिनीको मृत्यु भइसकेको छ। यता, इजरायली सेनाले पनि सो अवधिमा आफ्ना पाँच सैनिक मारिएको जनाएको छ।
यसैबीच, गाजामा मिडिया प्रतिबन्ध कायम रहेकाले अन्तर्राष्ट्रिय सञ्चारमाध्यमहरूलाई क्षेत्र प्रवेशमा अझै रोक लगाइएको छ। यसले घटनास्थलको स्वतन्त्र पुष्टि र विस्तृत विवरण संकलनमा कठिनाइ भइरहेको बताइएको छ।
द्वन्द्व जारी रहँदा सर्वसाधारण नागरिक नै सबैभन्दा बढी प्रभावित भइरहेका छन् भने अन्तर्राष्ट्रिय समुदायले शान्ति स्थापनाका लागि दुवै पक्षलाई संयम अपनाउन आग्रह गर्दै आएको छ।
Leave a Reply