काठमाडौं — पूर्व प्रधानन्यायाधीश चोलेन्द्रशमशेर जबरालाई प्रहरी हिरासतमा भेट्न गएको आरोपमा सशस्त्र प्रहरी बलका अतिरिक्त महानिरीक्षक (एआईजी) वंशीधर दाहाल निलम्बित भएका छन् ।
गृह मन्त्रालयले सशस्त्र प्रहरी बल प्रधान कार्यालयको प्रतिवेदनका आधारमा एआईजी दाहाललाई निलम्बन गर्दै घटनाबारे छानबिन गर्न समिति गठन गरेको हो । मन्त्रालयका अनुसार छानबिन समितिले तीन दिनभित्र प्रतिवेदन बुझाउनेछ ।
दाहालले सम्बन्धित निकायलाई जानकारी नदिई काठमाडौंको माइतीघरस्थित प्रहरी हिरासतमा रहेका पूर्वप्रधानन्यायाधीश जबरालाई भेटेको आरोप लागेको छ । स्रोतका अनुसार जबरालाई मध्यरातमा पक्राउ गरिएको खबर पाएपछि दाहाल बिहानै हिरासतस्थल पुगेका थिए ।
दाहाल र जबराबीच पारिवारिक सम्बन्ध रहेको बताइएको छ । यही कारण दाहाल व्यक्तिगत रूपमा भेट्न गएको स्रोतको दाबी छ । यद्यपि, हिरासतमा भेट्न जाने क्रममा संगठनलाई जानकारी नगराएको विषयमा समेत छानबिन भइरहेको बताइएको छ ।
दाहाल आगामी असोज २६ गते अनिवार्य अवकाशमा जाँदै थिए । अवकाशको केही दिनअघि नै निलम्बनमा परेपछि उनीमाथिको विभागीय कारबाही प्रक्रिया थप महत्वपूर्ण बनेको छ ।
पूर्वप्रधानन्यायाधीश जबरालाई मध्यरातमा पक्राउ गरिएको घटनालाई लिएर विभिन्न स्तरबाट प्रश्न उठिरहेका बेला उनलाई हिरासतमा भेट्न गएका सशस्त्र प्रहरीका उच्च अधिकारीमाथि समेत कारबाही अघि बढेपछि घटनाले थप चर्चा पाएको छ ।
गृह मन्त्रालयले गठन गरेको छानबिन समितिको प्रतिवेदनपछि एआईजी दाहालमाथि थप कारबाही हुने वा नहुनेबारे निर्णय हुने बताइएको छ ।
Leave a Reply