सुनको मूल्य तोलामा ११ हजार रुपैयाँ घट्यो

काठमाडौं – नेपाली बजारमा बुधबार सुनको मूल्यमा उल्लेख्य गिरावट आएको छ।

नेपाल सुनचाँदी व्यवसायी महासंघका अनुसार आज छापावाल सुनको मूल्य प्रतितोला ११ हजार रुपैयाँले घटेर ३ लाख १७ हजार ६ सय रुपैयाँ कायम भएको छ। अघिल्लो दिन मंगलबार सुन प्रतितोला ३ लाख २८ हजार ६ सय रुपैयाँमा कारोबार भएको थियो।

यससँगै सुनको मूल्य प्रतिदश ग्राम २ लाख ७२ हजार २ सय ९० रुपैयाँ निर्धारण गरिएको महासंघले जनाएको छ।

त्यस्तै, चाँदीको मूल्य पनि घटेको छ। आज चाँदी प्रतितोला ५ हजार ५ सय ४० रुपैयाँमा कारोबार भइरहेको छ, जबकि मंगलबार चाँदीको मूल्य प्रतितोला ५ हजार ८ सय १५ रुपैयाँ थियो। चाँदीको मूल्य प्रतिदश ग्राम ४ हजार ७ सय ५० रुपैयाँ कायम भएको छ।

अन्तर्राष्ट्रिय बजारमा देखिएको उतारचढावको प्रभाव स्थानीय बजारमा परेको व्यवसायीहरू बताउँछन्। पछिल्लो गिरावटले सुन–चाँदी कारोबारमा केही चलायमानता आउने अपेक्षा गरिएको छ।