सुनको मूल्य घट्यो, चाँदीको बढ्यो

काठमाडौँ — स्थानीय बजारमा आज सुनको मूल्यमा सामान्य गिरावट आएको छ भने चाँदीको मूल्यमा हल्का वृद्धि भएको छ। बिहीबारको तुलनामा सुन प्रतितोला रु ५०० ले घटेको छ भने चाँदी प्रतितोला रु १५ ले बढेको छ।

नेपाल सुनचाँदी व्यवसायी महासङ्घका अनुसार आज छापावाल सुन प्रतितोला रु ३ लाख १४ हजार ९०० मा कारोबार भइरहेको छ। बिहीबार सोही परिमाणको सुन रु ३ लाख १५ हजार ४०० कायम भएको थियो। यस्तै, आज चाँदी प्रतितोला रु ५ हजार ७४० निर्धारण भएको छ, जुन अघिल्लो दिन रु ५ हजार ७२५ थियो।

यसअघि गत बुधबार छापावाल सुन प्रतितोला रु ३ लाख १४ हजार ९०० र चाँदी रु ५ हजार ५८५ कायम भएको थियो भने सोमबार सुन रु ३ लाख १३ हजार ५०० र चाँदी रु ५ हजार ५९५ मा खरिदबिक्री भएको थियो।

अन्तर्राष्ट्रिय बजारमा भने आज सुनको मूल्य प्रतिऔँस ५ हजार १८७ अमेरिकी डलरमा कारोबार भइरहेको अन्तर्राष्ट्रिय सञ्चारमाध्यमहरूले जनाएका छन्। त्यस्तै, चाँदी प्रतिऔँस ९० अमेरिकी डलरमा किनबेच भइरहेको छ।